3 maande gelede
Wees versigtig!
wees slim: Doen jou huiswerk deeglik voordat jy in ’n maatskappy belê.Foto: datadriveninvestor.com  ~ 

MOENIE daai bonus sommer net so blaas nie – belê dit eerder slim. Maar doen eers goed navorsing voordat jy ’n belegging maak.

Suid-Afrika is onlangs deur ’n reeks korporatiewe skandale geruk wat aandelepryse van maatskappye soos Steinhoff en EOH dramaties laat daal het.

Ons het ’n paar wenke gekry by MMR, ’n goedgekeurde finansiëlediensteverskaffer in Vredendal.

Beleggers wat in Januarie laas jaar aandele in albei maatskappye besit het, sou sowat 98% van hulle kapitaal verloor het. Een van die grootste vrae wat die publiek het, is: Hoe het dit gebeur?

Wanneer hierdie twee marktoestande gefynkam word, is dieselfde patrone duidelik. Daar is natuurlik geen algemene reël wat toegepas kan word nie en geen ondersoek sal ál die antwoorde onthul nie. Maar om te wéét watter gevaartekens om op die uitkyk voor te wees, kan beleggers duisende rande spaar.

  • Wees bewus van die cult status van sekere beroemde uitvoerende bestuurders. Daar is niks aanloklikers as die storie van grootkoppe van ’n onder­neming wat met niks begin het en die korporatiewe leer tot sy hoogste punt geklim het nie.
  • Aggressiewe (dikwels internasionale) uitbreiding is nie altyd ’n goeie ding nie. Maatskappye wat skielik aggressief oorsee begin uitbrei, gebruik gewoonlik aansienlik baie kapitaal om ’n mark te penetreer waarvan hulle nie veel weet nie.

Baie Suid-Afrikaanse maatskappye wat al so uitgebrei het, het kort voor lank teruggekeer na Suid-Afrika, stert tussen die bene. As ’n maatskappy dus eendag besluit om sonder veel beplanning die helfte van sy kapitaal na ’n nuwe mark te neem, moet beleggers dit oorweeg of hulle daardie risiko wil loop.

  • Die afwesigheid van kontantvloei behoort beleggers dadelik af te skrik. Swak kontantvloei is een van die grootste tekens dat dinge nie reg is met ’n maatskappy se sake nie. Dit spreek regstreeks tot die manier waarop die maatskappy bestuur word.

Wees maar versigtig as jy hoor dat die maatskappy waarin jy wil belê, nie genoeg kontant het om hulle daaglikse bedrywighede te befonds nie. As ’n maatskappy van krediet gebruik maak om dit te doen, moet beleggers eerder hulle geld elders neem.

  • Ingewikkelde korporatiewe strukture is onnodig en gevaarlik. Hoe meer kompleks en oorlaai ’n maatskappy se struktuur is, hoe makliker is dit om finansiële misdrywe weg te steek. Finansiële verslae in sulke strukture is onverstaanbaar moeilik. As beleggers nie die maatskappy se verslae kan verstaan nie, moet hulle eerder wegbly.
  • Net omdat ál jou vriende en kollegas in iets belê, beteken dit nie noodwendig jy moet ook nie. Ons het dit gesien met die opkoms van crypto-geldeenhede soos Bitcoin wat die hoogte in geskiet het en ewe skielik amper waardeloos is.
Lewer kommentaar op hierdie artikel
0 reaksies
Lewer kommentaar
Kommentaar 0 oorblywende karakters