3 maande gelede
Oorweeg aanpassings deeglik
in DIE hospitaal: Daardie 100%-dekking beteken nie noodwendig jy en jou gesin is ten volle gedek nie. foto verskaf  ~ 

DIE volgende belangrike punte moet oorweeg word voordat jy enige verandering in die dekking deur jou mediese skema aanbring:

  • Jy kan enige tyd van die jaar na ’n laer voordeel-opsie in dieselfde skema beweeg. Sodoende vermy jy wagtydperke wat tipies gepaard gaan met ’n algehele verandering van skema-verskaffers.

Dit word tipies net aan die begin van ’n voordeel-tydperk toegelaat om ’n duurder opsie in jou mediese skema te koop. Dit beteken veranderinge moenie later as 1 Desember gemaak word nie en dit tree op 1 Januarie in werking.

  • Moet nooit van een mediese skema of voordeel-opsie beweeg net omdat die bydrae laer as jou huidige een is nie. Vergelyk die werklike voordele, uitsluitings, toegevoegde waardes en die diens­lewering saam met jou spesifieke gesondheidsorg-behoeftes, byvoorbeeld chroniese toestande en gereelde medikasie wat jy benodig.
  • Die 100%-dekking beteken nie noodwendig jy’s ten volle gedek nie. Spesialiste en in-hospitaal-koste kan dikwels tot 400% meer wees as die voordele wat die mediese skema bied. As jou mediese skema net 100% van die skaal betaal, is jy aanspreeklik vir die tekort of oorblywende 300% uit jou eie sak. Hier blyk dit dat polisse vir gapingsdekking vir tekorte in ’n mediese skema ’n uiters waardevolle veiligheidsnet is. Gapingsdekking cover sekere moontlike tekorte vir behandeling in die hospitaal en spesialis­besoeke teen ’n relatief goedkoop maandelikse gesins­premie.
  • Buite-hospitaal- en dag-tot-dag-limiete wissel dramaties tussen mediese skemas en voordeel-opsies. As die limiet op jou mediese spaarrekening laag is, maar jy moet die dokter gereeld besoek vir sekere toestande, kan jy vind twee of drie besoeke aan ’n spesialis put jou fondse gou uit. Jy moet dan alle verdere koste uit jou eie sak betaal of minstens totdat jy jou selfbetalingsgaping, indien van toepassing, bereik. Dit kan ’n paar duisend rand beloop.

“Jy kan ’n ingeligte keuse maak slegs nadat jy jou eise-geskiedenis, gesondheidstoestand en jou en jou gesin se unieke behoeftes oorweeg het, asook die vlak van selfbefondsing wat jy kan bekostig,” sê Janette Clark van Aon.

“Doen liefs ’n vergelyking van skema-dekking en verskillende voordeelopsies onder die leiding en advies van ’n profes­sionele gesondheidsorgmakelaar.

“Hulle kan ’n deeglike behoefte-ontleding doen en seker maak die veranderings benadeel jou nie finansieel nie.”

Lewer kommentaar op hierdie artikel
0 reaksies
Lewer kommentaar
Kommentaar 0 oorblywende karakters