11 dae gelede
Neseier: Wees wys
Dink maar mooi: Jy moet haarfyn uitwerk wat jy met jou aftreegeld gaan doen.Foto: istockphoto  ~ 

VAN ons is bevoorreg genoeg om al oor verskeie dekades heen vir ons aftrede te spaar.

Wanneer daardie dag aanbreek, kan jou aftree-neseier heel moontlik die grootste bate op jou balansstaat wees.

Wat jy uiteindelik met hierdie geld doen, is een van die mees kritieke finansiële besluite in jou lewe. Dit gaan immers jou leefstyl vir die volgende 25 tot 30 jaar bepaal, sê Christo Lineveldt, spesialis van Coronation Investment aan die webwerf solidariteit.co.za.

As jy naby aftrede is, moet jy binnekort twee besluite oor dié neseier neem.

Albei vereis noukeurige denke en dit is dalk die beste om die hulp van ’n onafhank­like finansiële adviseur in te roep, maan Lineveldt.

Maar seker julle praat oor die volgende oorwegings rakende elke keuse. Dit sal die proses makliker maak.

Neem ek ’n kontant-enkelbedrag uit my spaargeld? Indien wel, hoeveel?

Voordat jy besluit oor die hoeveelheid kontant wat jy as ’n enkelbedrag wil neem, moet jy die doel daarvan oorweeg. Is dit om uitstaande skulde by aftrede te vereffen, die koste van die voorafgaande aftreefonds te dek of ’n noodfonds op te stel? Oorweeg of jy dit kan bekostig.

In die algemeen is die finansiering van kapitaaltransaksies – die aankoop van ’n bate of vereffening van hardnekkige skuld – verkieslik bo die befondsing van lopende uitgawes.

Onthou, enige kontantbedrag wat jy onttrek, laat jou met minder kapitaal om die annuïteit aan te koop waaruit jy jou aftree-inkomste gaan verkry.

Lineveldt stel voor jy en jou onafhanklike finansiële adviseur kyk na jou persoonlike omstandighede en oorweeg likiditeit-scenario’s oor ten minste twee tot drie dekades.

Die soort aftreefonds waarvan jy lid is, sal die bedrag bepaal wat jy in kontant kan neem.

As jy lid van ’n aftree-annuïteit, pensioenfonds of bewaringsfonds is, is die toegelate kontant-uitbetaling tot een derde van die totale belegging of 100% van die totale waarde kleiner as R247 500.

As jy aan ’n voorsorgfonds of bewaringsvoorsorgfonds behoort, is ’n kontant-uitbetaling van tot 100% van die belegging moontlik.

’n Ander belangrike oorweging is belasting. Net die eerste R500 000 wat jy as ’n kontant-enkelbedrag neem, is belastingvry. Vir ’n groter bedrag geld vasgestelde belastingkoerse.

Waar belê ek die res?

Of jy nou ’n gedeelte van jou aftreespaargeld kontant wil neem of nie, jy moet die balans van jou belegging gebruik om ’n annuïteit te koop wat aan jou in jou aftrede ’n inkomste sal verskaf.

Volgens Lineveldt is daar tans twee main opsies – ’n lewende (of markgekoppelde) annuïteit of ’n gewaar­borgde (lewens-) annuïteit.

Die lewende annuïteit is aanpasbaar sodat jy soms meer en soms minder per maand kry. Die gewaarborgde annuïteit waarborg dieselfde bedrag elke maand.

Lewer kommentaar op hierdie artikel
0 reaksies
Lewer kommentaar
Kommentaar 0 oorblywende karakters