6 maande gelede
Beleggers verloor dalk miljoene rand
in die hof: Michael Rathbone en Leon Lewitton van Helping Hand Invest is Donderdag gearresteer vir beweerde bedrog en diefstal. Foto’s: FACEBOOK  ~ 

’N BEWEERDE ongemagtigde beleggingsmaatskappy in die Baai het glo mense se geld ingepalm.

Die naam van hierdie beweerde dodgy beleggingsmaatskappy wat mense glo ingedoen het, is ironies genoeg Helping Hand Invest.

Die gesamentlike bedrag wat dié helpende hand glo van sy beleggers gepocket het, beloop sowat R17 miljoen.

Michael Rathbone en Leon Lewitton, die twee direkteure van Help­ing Hand Invest in Newton Park, is vroeër dié week gearresteer vir onder meer bedrog en diefstal.

Hulle het Vrydag in die Baaise landdroshof verskyn. Die twee kan in ’n later stadium ’n formele borgtog-aansoek aanvra.

Kapt. Anelisa Ngcakani, woordvoerder van die Valke, het die arrestasie bevestig. Ngcakani sê: “Die Valke se eenheid wat ernstige handelsmisdaad ondersoek, het ’n 31- en 29-jarige verdagte gister (Donderdag) omstreeks 08:00 in Port Elizabeth gearresteer vir bedrog wat R17 miljoen beloop.

“Daar word beweer die twee het om en by van Junie 2016 tot Julie 2019 onwettig ’n beleggingsmaatskappy genaamd Helping Hand Invest bestuur.”

Die twee het na bewering beleggers in die Baai en omliggende areas, en ook so ver soos George en Barkly-Oos, gewerf.

Die beleggingsperiode was vir 6 tot 10 jaar. Hulle het die beleggers belowe hulle sal tussen 15% en 45% per jaar terugkry.

Ngcakani sê ondersoeke het onthul die verdagtes se maatskappy is nie ’n gemagtigde verskaffer van finansiële dienste nie, en daar is geen rekord van so ’n aansoek van die maatskappy nie.

Klagstaat

Die R17 miljoen is na bewering op die maandelikse salarisse van die verdagtes en hulle werknemers spandeer.

Luidens die klagstaat is Helping Hand Invest die eerste beskuldigde, Rathbone die tweede, en Lewitton die derde.

Daar is gebruik gemaak van vier bankrekeninge om betalings te ontvang en uitbetalings te doen.

Luidens die klagstaat het die beskuldigdes se agente aan beleggers aangedui hulle kapitaalbelegging sou ’n inkomste genereer soos wat die beskuldigdes onder meer eiendom, huise, oop grond en tweedehandse motors sou koop en verkoop.

Daar is ook klaarblyklik aangedui die beleggings sou in ’n fonds gehou word wat rente verdien.

Om die beleggers te oorreed om hulle geld by die maatskappy te belê en om nie hulle geld te onttrek nie, het die beskuldigdes die indruk geskep dat die besigheid sterk en suksesvol is.

Skuld

Hulle het ook voorgegee dat die maatskappy ’n gemagtigde finan­siëledienste-verskaffer is.

Luidens die klagstaat het die maatskappy in die periode vanaf 23 Mei 2017 tot 30 Augustus 2019 altesaam R17 574 869,50 in kapitaalbeleggings ontvang.

Maar die beleggingsgeld is blykbaar gebruik vir die betaling van salarisse, “direkteursfooie”, uitstaande skuld, rente- en kapitaal­betalings aan beleggers, asook vir lewensonderhoud en luukshede.

Volgens die Raad op Finansiële Dienste is daar vasgestel die beskuldigdes het aan die beleggers finansiële advies gegee terwyl hulle glad nie geakkrediteer is as gemagtigde finansiëledienste-verskaffers nie.

Die Bankwet is na bewering ook oortree omdat die beskuldigdes die besigheid deurgaans soos ’n bank bestuur het deur van die algemene publiek deposito’s te neem.

Daar was na bewering ook voort­durende werwingsaksies en daar is advertensies geplaas om meer beleggers te oorreed om fondse te deponeer.

Daarom word die twee en hulle maatskappy van bedrog en diefstal aangekla.

Die staat voer aan hulle het die Fais-wet, oftewel die Wet op Finansiële Advies- en Tussengangersdienste (no. 37 van 2002), asook die Wet op die Voorkoming van Georganiseerde Misdaad (no. 121 van 1998), oortree.

Lewer kommentaar op hierdie artikel
0 reaksies
Lewer kommentaar
Kommentaar 0 oorblywende karakters