10 dae gelede
Simson is diep in die knyp, en hier kom Dominee ...
 ~ 

HAAI, Sonlanders! Simson se plan om Delicia se kamer te bereik, boemerang lelik. Die arme klong swaai nou aan sy hare rond en is besig om te versmoor. Gaan iemand tot sy redding kom? Geniet nou die slothoofstuk van ELDRIDGE JASON se verhaal “Simson se Hare”.

AS ’N mens so hang en spartel om los te kom, dan flits jou lewe by jou verby.

En dit is presies wat op daardie oomblik met Simson gebeur.

Eers nou, noudat dit te laat is, besef hy dat hierdie plan van hom ’n simpel een was.

Maar spyt kom mos altyd later as ’n Metrorail-trein.

Sy hele lewe lê nog voor hom, en hier swaai hy rond soos ’n Krismis-trimming in die wind.

Wat op daardie oomblik net ’n bestiering kan wees, is dat Delicia by haar venster uitloer en Simson soos ’n vis uit die water sien spartel.

Sy los ’n gilletjie toe sy besef wat aan die gebeur is. Delicia hardloop na haar klerelaai en gryp ’n skêr.

Sonder om twee keer te dink knip sy haastig Simson se hare af.

’n Plofgeluid klink op toe Simson na benede tuimel. Delicia nael by haar kamer uit en met die trappe af na buite.

Buite lê en kreun en roggel Simson. Van nie weet wat om te doen nie, hardloop Delicia weer die huis binne en kom dan met ’n beker yskoue water uit.

Sy skiet dit in sy gesig.

Simson raak aan die proes en beur swaar orent.

“Is jy dan dja–”

Delicia bly stil toe haar pa in sy spoggerige Audi die jaart binnegery kom.

Ds. Lackay begin skel in psalms wat oorle Dawid nooit oor sy hart sou kry om te skryf nie.

Hy spring uit die kar, kom met lang hale na Simson gestap en pluk hom orent. Ds. Lackay moet met moeite die gees in bedwang hou wat hom in sy sondige tyd so in die smokkies laat rondhang het.

Dan merk hy Simson se afgesnyde hare wat in slordige slierte hang.

Voordat die godsman homself kan keer, bars hy uit van die lag. Hy verslap sy greep en ’n verdwaasde Simson plons met sy sitvlak terug op die grond.

Ds. Lackay lag so hard dat sy buurvrou antie Bettie nuuskierig by haar venster uitloer.

“Ek wil nie weet wat hier gebeur het nie,” sê ds. Lackay en vee die lagtrane van sy gesig af.

“Delicia, hierdie ene los ek maar vir jou om uit te sort.”

Met hierdie woorde draai die dominee om, sluit sy kar en stap dan die huis binne.

Delicia staan met haar hande in haar sye. Skêr steeds in die een hand. Haar oë blits.

“Ek neem aan jy het ’n baie goeie explanation vir wat jy besig was om te doen?” sis sy. “Wou jy my afloer of ’n ding?

Simson skud sy kop heftig. Hy wil praat, maar sy keel voel nog baie seer.

Die woorde wil ook nie so lekker in sy kop vorm nie.

Voordat hy egter sy ducks in ’n row kan kry, storm Delicia met die skêr vorentoe.

Vir ’n oomblik dog Simson sy gaan hom steek of ’n ding.

Maar dan, sonder ’n woord, kry Delicia hom aan die hare beet en begin vir ’n vale sy bos afknip.

Delicia is so woes op Simson se kop doenig dat die trane in sy oë begin opdam.

“Ek is jammer,” sê hy skor. “Ek is nie ’n peeping Tom nie. Ek wou net met jou kom praat. Ek ... Ek hou nie daarvan dat jy so baie saam met Carlos uithang nie.”

Simson se gesig vertrek van die pyn toe die skêr in sy hare vashaak.

Delicia steur haar egter nie aan sy krete nie. As Simson ’n skaap was, dan was hy nou ’n geskroeide tjoppie.

Ná ’n paar minute raak die skêr-gevoel uiteindelik stil.

Simson voel-voel versigtig oor sy kop. Hy vlieg orent.

“Wat ... Wat het jy gedoen? My hare! My hare! My ma gaan my mos bedood!”

“Relax,” antwoord Delicia komkommerkoel. “Dit is eintlik iets wat ek lankal wou doen.”

Daar is ’n gepynigde uitdrukking op Simson se gesig toe hy Delicia aangluur.

Delicia is egter ashes.

“Jy is so behep met jou hare dat jy nie eens agtergekom het niemand wil met jou tjommies wees nie.

“Weekends, wanneer almal in die pad krieket speel, sit jy in die son om jou hare droog te maak.

“Nes die vere nie die voël maak nie, behoort jou hare ook nie ál te wees wat jou as mens maak nie.”

Simson byt sy onderlip vas. Wat Delicia sê, maak sin. Behalwe vir haar het hy niks vriende op die dorp nie.

Nooit het hy gedog dat sy hare die bron van sy eensaamheid is nie. Maar hoekom voel hy nou so kaal gestroop? So kragteloos?

“Ek gaan ’n spieël haal dat jy kan sien hoe jy lyk,” sê Delicia. Sy draai om en hardloop die huis binne voordat hy iets kan sê.

Agter hom maak iemand kliphard keel skoon. Simson draai om. Antie Bettie gluur hom kopskuddend aan.

“Ek kon nie anders as om jul gesprek te hoor nie,” sê die gryse antie. “Ek is mos nou nie iemand wat ander mense se gesprekke afluister nie.”

Yeah, right, dink Simson vies.

“Baie sal my sien as ’n skinderbek, maar ek sê ’n ding soos wat ek hom sien.

“En wat ek nou al oor die jare gesien het, is dat jy vir niemand in hierdie lewe moet verander nie.

“Hoe meer jy verander, hoe meer wil mense hê.”

“Wat probeer antie Bettie dan nou eintlik sê?” vra Simson vies en vryf weer oor sy kaalkop.

Antie Bettie trek haar skouers op. “Dat ’n hond hare k*k. Ek sou dink dis redelik obvious,” sê die antie.

Voordat Simson kan antwoord, gaan sy vinnig voort: “Wag, ek dink iemand klop aan my voordeur. Ek het gesê wat ek wou sê.”

Antie Bettie draai om en stap weg. Simson gaap haar verdwaas agterna. Die vrou is nie lekker in haar kop nie, dink hy. Die Jehova’s Winess’e klop lankal nie meer aan mense se deure nie.

Delicia kom met ’n klein handspieëltjie in die hand by die voordeur uitgehardloop.

Sy verloor egter haar balans en los ’n geskokte gil toe die spieël op die paving flenters val.

“Agge nee,” sê Delicia teleurgesteld. “Nou wag sewe jare van ongeluk op my.

Simson grinnik en stap nader om te help om die splinters op te tel.

Hy buk af en die butterflies kielie sy maag toe hy in Delicia se oë kyk.

“Wanneer ek in jou oë kyk, voel ek so kragteloos,” sê hy.

Delicia lag. “En kragteloos sal jy bly as jy vir die volgende sewe jaar kans sien vir my.”

Simson lag.

“Wonder wat jou pa gaan sê.”

“Daai gaan nie ’n probleem wees nie,” antwoord Delicia en giggel. “Jy en jou flenter-hare het hom die eerste keer in jare laat lag.

“Ná Mammie se dood ... Daddy was maar baie aan die sad en moerige kant, maar jy ... Daai lang hare van jou het my pa weer die snaaks in die lewe laat raaksien.”

Simson grinnik in sy skik. As hy die dominee kan aanhou laat lag, is hy A for away by Delicia.

  • Die einde

Meer Stories

Lewer kommentaar op hierdie artikel
0 reaksies
Lewer kommentaar
Kommentaar 0 oorblywende karakters