Verlede maand
Mosselbaai rou ná 2 leerders se dood
michaela booysen
Michaela Booysen  ~ Verskaf

DIE dood van twee leerders van dieselfde skool het Mosselbaai in rou gedompel.

Die twee onverwante voorvalle het binne 24 uur van mekaar plaasgevind.

Ivan Kronenberg, skoolhoof van Hillcrest, bevestig in ’n voice note aan ouers die tragiese gebeure.

Die 16-jarige Michaela Booysen is Sondag omstreeks 02:40 in Aslapark vermoor toe drie mans haar en ’n vriend na bewering in Dywilisstraat aangeval het.

Haar 24-jarige vriend het betyds ontsnap en is nie in die voorval beseer nie.

Maar Michaela is blykbaar met ’n piksteel teen die kop geslaan.

Volgens ’n bron wou die aanvallers haar van haar swart Nike- tekkies­ beroof. Die luisgatte het daarna weg­gehardloop.

’n Betroubare bron noem ook: “Michaela se ma is ook vyf jaar gelede deur haar pa met ’n byl vermoor. Hy dien tans tronkstraf uit.

“Michaela het by haar ouma gewoon. Haar jonger boetie is ook in die tronk vir diefstal.”

In die ander voorval is Khuselo Ndanda (16) weens verskeie messteekwonde aan sy bolyf dood.

Die seun was Maandag by ’n bakleiery by die skool betrokke.

Volgens Kronenberg was daar laas maand in die eksamenlokaal ’n onderonsie tussen Ndanda en die verdagtes. Hy is tóé ook gelem, maar het nie die voorval aangemeld nie.

Kronenberg voeg by twee leerders is vir die moord gearresteer.

“As voorsorgmaatreël sal wagte vir die volgende twee weke by die skool wees.”

Al kon niemand dit bevestig nie, bespiegel mense dat die messtekery verband hou met ’n messteekvoorval vroeër vanjaar by die Sekondêre Skool Indwe.

khusela ndanda
Khusela Ndanda

Harry Levendal, mayor van Mosselbaai, het albei moorde skerp veroordeel.

Oortreders

“Dié dade deur misdadige elemente wat jong en weerlose vroue en kinders in ons gemeenskap teiken, is skokkend,” sê hy.

Levendal het ’n beroep op die polisie gedoen om alles moontlik te doen om die oortreders op te spoor en hulle te laat boet vir die afskuwelike dade.

Die voorvalle het talle inwoners van die kusdorpe aan die praat en laat die kollig opnuut op misdaad, bendeverwante geweld en dwelms val.

Op Facebook vra inwoners ook waarom soveel dranklisensies in die gebied toegestaan word, aangesien dit nou in ’n dwelm- en dronknes ontaard wat skoolkinders teiken.


Lewer kommentaar op hierdie artikel
0 reaksies
Lewer kommentaar
Kommentaar 0 oorblywende karakters