Verlede maand
Cleft Friends laat kinders én hul ouers weer glimlag
MOEDERTJIE! Danksy die fantastiese werk van die Smile Foundation en Cleft Friends kan klein Winston en sy mammie, Jacky Engela, nou breed smile.  ~ Foto Verskaf

DIE Smile Foundation is deesdae ook besig om smiles op ouers se gesigte te sit.

Gewoonlik as jy swanger is, tower jy as mamma ’n prentjie in jou mind op van hoe jou kind gaan lyk.

Dalk is hy of sy ’n ewebeeld van derra, of dalk het die baba eienskappe van albei ouers.

Maar een ding waarvan jy jouself verseker, is dat die baba die mees perfekte klein mensie ooit sal wees.

“Soms is die prentjie nie soos jy dit in jou kop geskilder nie” vertel Helena Cullis, ’n stigterslid van Cleft Friends, ’n afdeling van die Smile Foundation.

Dis hoekom dié mammie saam met haar man en ’n paar vriende die tak begin het.

Cullis sê toe sy in 2009 die lewe aan haar seun geskenk het, was die oomblik ver van wat sy in gedagte gehad het.

“Daar was soveel hartseer in die kamer toe daar ver­onderstel was om vreugde te wees. Pleks van gelukwensings, moes ons vrae hoor soos: ‘Wat het gebeur?’

“Ek het self nie geweet wat ’n gesplete verhemelte is nie, so ek was angstig en het nie geweet waarheen om te gaan nie.

“Dit is die rede waarom ons dié afdeling begin het.”

Cullis en haar span kontak toe die welbekende nie-regeringsorganisasie Smile Foundation, wat kinders help met gesigstoestande soos gesplete verhemeltes, rekonstruktiewe gesigsoperasies en ander behandeling.

So, pleks van net smiles op die kinders se gesigte te sit, sit hulle nou ook smiles op die ouers se gesigte.

Aanpassing

Cullis sê die doel van Cleft Friends is om vir die ouers ’n ondersteuningstruktuur te wees en hulle minder afgesonder te laat voel.

“Ons het geleer dit is ’n lewenslange aanpassing.

“Jou baba moet soveel operasies ondergaan en baiekeer weet jy as ouer nie wat om te verwag nie.

“Maar met Cleft Friends help ons dié ouers om die lewe te vier; ons stap saam met hulle en wil hê hulle moet weet hulle is nooit alleen nie – ons is hier om letterlik en figuurlik die gaping te vul.”

Cullis sê haar seun is nou 11 jaar oud en hy vaar goed.

“Hy is danksy die Smile Foundation so normaal soos enige ander kind en ons hart is om dié rede so bly omdat ons nou dieselfde vir ander ouers kan doen.”

Meer Stories

Lewer kommentaar op hierdie artikel
0 reaksies
Lewer kommentaar
Kommentaar 0 oorblywende karakters