9 dae gelede
Arch dink min van uitrolplan
thabo
Thabo Makgoba, Anglikaanse aartsbiskop van Kaapstad  ~ FOTO24

DIE Anglikaanse aartsbiskop Thabo Makgoba sê hy is skepties oor hoe die uitrol van die Covid-19-entstof in Suid-Afrika sal vorder.

Makgoba het Saterdagaand ’n Paasnaweek-preek in die Sint George-katedraal in Kaapstad waargeneem.

“Amerika het reeds omtrent 16% van sy bevolking in­geënt terwyl ons minder as 0,5% van ons s’n gedek het.

“En baie lande het nog glad nie entstof gesien nie,” merk Makgoba op.

Hy het ook wêreldmoondhede daarvan beskuldig dat hulle “entstof-apartheid” be­oefen en gevra dat armes en gemarginaliseerdes teen dieselfde tempo in­geënt moet word as die­gene in ryk lande.

Armes

“Die vrywillige verskaffingsmeganismes vir entstowwe soos Covax en tweesydige ooreenkomste wat gebruik word om entstowwe wêreldwyd aan te skaf, misluk.

“Dit misluk veral vir die wêreldwye suide, waar ons met regverdiging kan sê dat die armes van die wêreld onder entstof-apartheid ly.”

Die aartsbiskop het verder gekap na betrokkenes by die politieke korrupsie wat ons openbare gesondheidsorgstelsels vergiftig het.

Hy het ’n beroep op die regering asook Suid-Afrikaanse besighede gedoen om ’n gekoördineerde plan met ’n duidelike, haalbare en gepubliseerde rooster te ontwikkel sodat almal die entstof kan kry. – EWN

Lewer kommentaar op hierdie artikel
0 reaksies
Lewer kommentaar
Kommentaar 0 oorblywende karakters