2 maande gelede
Woedende Rory sit vir Terrible mooi in die skool
 ~ 

HAAI, Sonlanders! Rory loop Bubbles­, ’n oud-inmate, raak toe hy ’n bietjie langs die strand gaan stap. Bubbles vertel aan Rory dat Mary-Anne met ’n dikding-gangster deurmekaar is wat uit die Kaap na die Weskus gevlug het. Dié nuus skok Rory, want nie Mary-Anne of sy ouers het vroeër ’n woord hieroor gerep nie. Hy besluit om Mary-Anne te gaan konfronteer. Hy kom face to face met dié berk, Terrible, wat dreig om hom ’n loesing soos min te gee. Geniet nou die voorlaaste hoofstuk van ELDRIDGE JASON se verhaal ’n Nuwe Begin.

RORY bal sy vuiste en staan gereed vir ’n fight.

Terrible is ’n reus van ’n ou met boomstompe vir boarms.

Maar hy wat Rory is, ken dié ouens. Hulle lyk so tough, maar ’n harde en geniepsige skop in die ballas sal hulle soos ’n baba laat huil.

“Ek moet admit, djy gaan my dag maak,” sê Terrible. Hy loop oor van selfvertroue.

“Ek is hoeka lankal lus om ’n boejong in sy tjops te skop. So, kom, make my day.”

Mary-Anne spring tussen die twee mans in.

“Julle gaan wragtig nie van my ma-hulle se huis ’n bokskryt maak nie,” sê sy kwaad. Sy draai na Rory.

“Jy is nog nie eens ’n week uit die tronk nie en jy tender weer om terug te gaan.

“Ek is seker jy is uit op paroolvoorwaardes wat sê jy mag jou nie aan ’n misdaad skuldig maak nie.

“Wil jy nou regtig alles loop staan en weggooi – en dit in ’n fight oor ego’s?”

Toe draai sy na Terrible. “En ek het jou gesê ek stel nie in jou belang nie, maar jou vel is mos dikker as dié van ’n politician.

“Sien jy nou? Die mense maak stories op dat ons saam is.

“Ek wil hê jy moet in jou kar klim, ry en nooit weer jou voete hier sit nie. Ek gaan nie my kind aan elemente blootstel nie.”

“Elemente? Elemente?” vra Terrible snedig.

“Djy mean sieke dié ding wat hiesa staan, nè?

“Is mos met soe ’n element met wie djy ’n kind gelê en maak het.

“But aan’ie anne kant ... wie sê is dié jong se kind, cos why ek’t ’n juicy storie gehoo’ dat djy oek mettie brudder was.”

Rory sien hoe Mary-Anne ineenkrimp oor Terrible se kwetsende woorde.

Die pyn in haar oë, die hartseer-trek langs haar oulike mond ... dit roer iets binne hom.

Hy wil haar vashou, haar daarvan verseker dat hy haar sal beskerm teen die wêreld en ál sy Terribles, dat hy ...

Dat hy haar liefhet.

’n Oomblik staan Rory stom van verbasing. Dít is waarteen hy nou al jare stry – sy gevoelens vir Mary-Anne.

Sy was nog altyd die girl van sy drome – is stééds die girl van sy drome.

“En as jy nou so met ’n bek vol tanne staan, ha?”

Terrible se woorde ruk Rory na die werklikheid terug.

Hy ignoreer die man skuins oorkant hom en draai na Mary-Anne.

“Ek is jammer oor als,” prewel hy.

“Ek is jammer dat ek so ’n d**s in die lewe was.

“Ek is lief vir jou. Maak nie saak hoe mense jou probeer slegmaak nie, ek weet jy is nie ’n slegte vrou nie.”

’n Traan loop oor Mary-Anne se wang.

“Haai shame, is hierie da’ nou Days of our Boring Lives?” chime Terrible in.

“Ek dink julle twie deserve mekaa’.

“Die een is ’n bandiet en die anne een ’n jin–”

“Jy beter jou bek hou,” sis Rory.

“Een phone call ... één ... en die ouens innie Kaap van wie jy weggehardloop het, is hier om met jou af te reken.

“Ek weet van jou. Ek het gehoor van die nwattas wat jy aangevang en toe weggehardloop het.

“Daar is ouens wat bloed wil optel ...”

Terrible raak spierwit in sy gesig.

“Djy sallie,” sê hy. Spoeg spat in alle rigtings.

“Eeuw,” sê Rory met afgryse. “Het jy Paternoster toe gekom om TB as ’n laat Krismis-gift te kom uitdeel?

“Moenie my dare nie, want ek sál jou verkeerd bewys.

“Jou dae hier is getel, but ek dink jy weet dit al. As jy weet wat goed vir jou is, dan stel ek voor jy kry jou ry.

“Jy gaan nie meer jong mense se lewe opf*k met die gemors waarmee jy smokkel nie.

“Get lost and report yourself missing.”

Terrible gluur Rory aan. Dan stap hy traag na sy kar toe. Hy maak die deur oop en voordat hy inklim, draai hy om.

“Eendag is eendag,” sê hy dreigend. “As ek djy is, loer ek altyd oor my skouer. Ek gaan kom vir djou wanne djy dit die minste expect­.”

Rory lag. “Promises and lies,” sê hy sarkasties.

“Jy weet mense soos jy leef nie lank nie. Jý is die een wat altyd oor jou skouer moet kyk en wonder wanneer jou sondes jou met ’n bullet gaan inhaal.

“Ek weet voordat jy enigiets aan my kan doen, sal die enemies wat jy deur die jare gemaak het, jou vastrek.

“But hou nou op k*k praat en maak dat jy wegkom. F*kk*f!”

Terrible klim in sy kar, skakel dit aan en trek met skreeuende bande weg.

Toe hy om die draai verdwyn, praat Mary-Anne die eerste keer in ’n lang ruk.

“Ek is trots op jou,” sê sy met ’n breë smile.

“Op my?” vra Rory uit die veld geslaan.

“Wat het ek dan gemaak?

“Is mos nie asof ek matriek met ’n PDF geslaag het nie.”

Mary-Anne bars uit van die lag. “Ek het gewonder of ek ooit weer vir Rory die grapgat gaan sien,” sê sy.

“Maar wat ek bedoel, is dat ek baie impressed is met hoe jy jou woede beheer het.

“Jou kop kon uitgehaak het. Jy kon in ’n fight met Terrible betrokke geraak het en so weer in die tronk beland het.

“Maar jy het gewys jy is ’n beter mens as hy en kan hom met sy eie medisyne 6-0, 6-0, 6-0 wen.”

Daar is ’n ernstige trek in Rory se oë. “Dis jy wat my sane gehou het.

“Jy en ons kind. Ek kan nie weer jare lank sonder julle bly nie.

“Ek wil nie eendag vol regrets in ’n AllPay-lyn staan nie.”

“So, jy was ernstig? Jy het nog feelings vir my?”

“Maar natuurlik, vroumens,” verklaar Rory laggend.

“Ek sal mos nie sulke goed uit my duim suig nie.

“Jy is, was en sal altyd my one and only bly.”

Mary-Anne lag. “Charmer,” spot sy. “Maar jy kan later ál daai komplimente in my oor fluister.

“Kom, daar is iemand wat nie kan wag om jou te ontmoet nie ...”

  • Môre: Slot

Meer Stories

Lewer kommentaar op hierdie artikel
0 reaksies
Lewer kommentaar
Kommentaar 0 oorblywende karakters