2 maande gelede
Bubbles lig Rory in oor Mary-Anne se terrible fout
 ~ 

HAAI, Sonlanders! Dit lyk of dinge tussen Rory en sy ma aan die verbeter is. Antie Mary moedig Rory aan om dinge reg te maak met Mary-Anne en om ’n verhouding met sy seun op te bou. Rory is heel verbaas oor die ommeswaai in sy en sy ma se verhouding. En dan los antie Mary nog ’n bom: Sy het kanker en het nie lank om te leef nie. Antie Mary sê voor sy tot sterfte kom, sal sy graag wil sien dat Rory dinge regmaak met almal wat hy leed aangedoen het. Geniet nou hoofstuk 6 van ELDRIDGE JASON se verhaal’n Nuwe Begin.

RORY loop af strand toe. Hy moet sy kop skoonmaak.

Die gesprek met sy ma … Hy het nooit gedink sy ma voel so oor hom nie.

Nooit het hy kon dink dat daar liefde vir hom in sy ma se hart kan wees nie. Sy was dan altyd so streng met hom, het nooit ’n goeie woord vir hom gehad nie.

Eers nou verstaan hy dat dit haar manier van omgee was. Dat sy hom op haar manier probeer motiveer het.

Hy staar na die lang rye posh huise langs die strand. Paternoster is nou Poshnoster, dink hy.

Hy onthou sy kinderdae waar die witgekalkte vissershuisies langs die strand gestaan het. Nou is die strand met sy pragtige uitsig net die geldgatte van hierdie lewe beskore.

“Rory, is dit jy?”

Rory wip van die skrik toe ’n stem agter hom opklink. Hy swaai vinnig om.

Die bruingebrande gesig voor hom wil-wil bekend lyk.

“Auw, ken die ou dan nie meer vir my nie?” vra die man beskuldigend.

Dan, as hy geen reaksie van Rory kry nie, gaan hy voort.

“Is ek, man, Bubbles.”

’n Lig gaan by Rory op. Natuurlik! Bubbles, die dorp se eerste krimineel.

Hy onthou hy was nog op skool toe Bubbles gevang is inbreek by die plaaslike visfabriek. ’n Vrag polisievêns het die sandduine langs die strand gefynkam op soek na Bubbles.

En toe hulle hom uiteindelik vang, is Bubbles eers goed geslaan en daarna na die polisiestasie in Vredenburg gevat.

Bubbles is destyds vir lank tronk toe gepos en toe hy daar uitkom, het hy ’n snaakse rol gehad, ’n kofia gedra en gemaak asof hy die toekenning vir die skollie van die jaar in Pollsmoor losgeslaan het.

Om nie te praat van die spyker-tjappies wat sy hele gesig ontsier het nie.

“Natuurlik onthou ek jou,” sê Rory.

“Hoe gaan dit, Bubbles?”

Bubbles trek sy skouers op. “Arm maar darem. Ek sien jy is weer buite. Seker lekker om weer iets anders as daai liefdelose kos van die mang te eet, nuh?”

Rory grinnik.

“Jy weet mos. Daai isse plek waarheen ek nie weer wil gaan nie.”

Bubbles staar oor die see.

“Tog is dit ’n plek waarna ’n man verlang, espe­cially as jy hier buite kom en almal kyk jou aan asof jy ’n stuk gemors is.

“Ek raak baie kere weer lus om terug huis toe te gaan.”

“Daai is nie ’n huis nie,” sê Rory. “Daai is die hel.”

“Ten minste is ’n man omring met duiwels wat jy ken. Nie die skynheilige duiwels wat hier buite rondloop nie.”

Rory lag.

“Ek gaan maar niks sê nie. Ek het net gekom vir ’n bietjie vars lug voor ek na Mary-Anne toe gaan.”

“Wat wil jy by daai sturvy goose gaan maak?” vra Bubbles heel voorbarig.

Rory frons.

“Daai is ’n bietjie my besigheid,” antwoord hy kortaf.

Bubbles laat hom nie van stryk af bring nie.

“Ek hoop jy weet jy soek vir moeilikheid.”

“Hoe mean jy?” vra Rory.

Bubbles trek sy skouers op.

“Daai is Terrible se goose, daai. En Terrible vat nie k*k van kabouters nie.”

“Terrible?”

“Terrible, man. Terrible … ken jy nie vir Terrible nie?” vra Bubbles.

Rory skud sy kop.

“Broe’, ek was vir lank in die mang. Daar is baie nuwe gesiggies hier wat ek nie ken nie.

“En toe ek nog laas hier was, was hier beslis nie iemand met ’n terrible naam soos Terrible nie.”

Bubbles lag kliphard.

“Moenie dat Terrible jou hoor nie. Soos ek dit verstaan, was hy ’n dikding daar innie Belhar.

“Nou run hy die show hier. En vir Mary-Anne.”

Rory voel meteens hartseer. Hy weet nie hoekom hy so voel nie. Hy en Mary-Anne is immers donkiejare nie meer ’n couple nie.

Maar as hy niks meer voel vir haar nie, hoekom voel dit of ’n deel van hom uit sy borskas geruk is?

“Jy lyk asvaal in die gesig,” sê Bubbles.

“Hoe lyk dit dan jy het nog feelings vir daai goose?”

Rory skud sy kop heftig.

“Jy maak jou laat. Ek voel niks vir haar nie.”

“As jy so sê,” antwoord Bubbles. “Glo jy maar jou kop se k*k. Anyway, laat dit goed gaan.

“Laat ek maar weer gaan skarrel vir ’n kroon.”

Bubbles stap weg. Rory byt op sy onderlip.

Mary-Anne met ’n gangster deurmekaar? Hoekom het sy pa-hulle dan niks hiervan gesê nie?

En hoekom het Mary-Anne self dan nie ’n woord hieroor gerep nie?

As daai Terrible-jong uit Belhar hierheen gekom het, dan beteken dit net een ding: Dinge het te warm vir hom daar geraak.

En Mary-Anne maak hulle kind groot saam met ’n jong wat soveel gevaar inhou.

Die woede begin in Rory se binneste broei.

Hy gaan haar nóú sien. Sy sal haarself moet verduidelik.

Haastig stap hy oor die sand terug Kliprug toe. Hier en daar groet ’n paar mense hom.

Hy is egter so blind en doof van woede dat hy hulle nie eens hoor nie.

Van ver af sien hy ’n spoggerige convertible voor Mary-Anne-hulle se huis staan.

Mary-Anne en ’n man staan buite die hekkie toe hy nader aan die huis gestap kom.

Haar oë rek van verbasing toe sy hom sien.

“Rory … wat … wat maak jy hier?” vra Mary-Anne stotterend. “Ek het nie gedink –”

“Dat ek sal uitvind van jou dinge nie?” val hy haar in die rede.

“Djy … djy!” sê die onbekende man langs haar.

“Djy praatie soe mette dame nie.”

“Dis orrait, Terrible,” probeer Mary-Anne paai.

“Laat ek hierdie ding self uitsorteer.”

“Ek kannit easily vir jou uitsort,” sê Terrible.

“Ek is baie lus om hierie mannetjie op sy plek te sit.”

  • Lees môre verder
Lewer kommentaar op hierdie artikel
0 reaksies
Lewer kommentaar
Kommentaar 0 oorblywende karakters