3 maande gelede
Franse bouillabaisse
 ~ 

Daar is vele aansprake dat die tradisionele bouillabaisse-resep sy oorspronk is Frankryk se Provensaalse streek het. Maar bouillabaisse is meer 'n kookmetode as 'n resep. Vissermanne het tradisioneel 'n groot pot gebruik om die kombinasie van vis wat nie daardie dag by die mark verkoop is nie vir hul eie gebruik te berei. Hulle sou dit geur met vars kruie uit die omgewing, olyfolie en tamaties van 'n goeie gehalte, en sou dit dikwels lyf gee met skulpvis soos mossels.

Bestanddele:

  • 50 ml olyfolie
  • 1 middelgroot rooi ui, grofgekap
  • 1 prei, in dun skyfies opgesny
  • 1 klein vinkelknol, in dun skyfies opgesny
  • 1 rooi soetrissie, in dun skyfies opgesny
  • 2 knoffelhuisies, stukkend gepers
  • 500 g visstukke, soos stokvis OF forel
  • 1 middelgroot aartappel, afgeskil, grofweg in blokkies gesny en gekook
  • 1 lourierblaar
  • 'n paar takkies tiemie
  • 'n knippie saffraan (opsioneel)
  • 5-6 jenewerbessies
  • 1 blik heel tamaties
  • sout en varsgemaalde swartpeper na smaak
  • 100 ml rooiwyn (opsioneel)
  • 12 mossels, skoongemaak

Metode:

1. Verhit die olyfolie in 'n groot pot en soteer die ui en prei daarin tot dit begin karamelliseer.

2. Voeg die vinkel, rooi soetrissie, knoffel en vis by en soteer alles liggies saam.

3. Voeg die gaar aartappel, kruie en speserye saam met die tamaties by en laat sowat 10-15 minute lank saggies prut.

4. Verwyder een-derde van die sop en verpulp dit in 'n versapper.

5. Sodra dit 'n gladde konsistensie kry, gooi dit terug in die pot saam met die vis, mossels en rooiwyn, verhit weer effens en laat dit 'n paar minute lank prut.

6. Geur na smaak en bedien warm.

*Resep uit: Die Suid-Afrikaanse vis- en seekos kookboek deur LAPA UITGEWERS.

Lewer kommentaar op hierdie artikel
0 reaksies
Lewer kommentaar
Kommentaar 0 oorblywende karakters